Угостителите од државата бараат средби со надлежните кои го донесоа новиот Закон за заштита од пушењето, со кој од Нова година на полноќ, се забранува пушење во сите угостителски објекти, летни бавчи и тераси. Тие инсистираат на извесни промени во Законот.
Струјата од први јануари ќе поскапи за 9,98 проценти, одлучи Регулаторната комисија за енергетика. Од Нова година поскапува и парното греење во Скопје. Домаќинствата кои добиваат топлинска енергија од топланите Исток, Запад и Центар, ќе плаќаат повисока цена за 1,49 насто.
Од вкупно 261.804 невработени лица во Македонија, досега во Фондот за здравство својот статус го регулирале само 148.828, кои во иднина своите сини картони ќе ги добиваат на домашна адреса.
Министерот за економија, Фатмир Бесими, потпиша договори за концесии за детални геолошки истражувања на минерални суровини со најдобрите понудувачи на јавниот оглас, објавен од Министерството за економија на 31 август годинава.
