Дневен брокерски извештај - 08 јули 2009

Ако вчерашниот ден на македонската берза не беше интересен, за денеска не треба ни да пишуваме бидејќи и нема многу што да се напише. Во недостиг на патоказ (или на инвеститори) прометот на македонската берза денеска беа крајно мал. Како сите да заминале на годишен одмор, што впрочем и може да го направат со оглед на неслучувањата. Вкупниот промет едвај премина 5 милиони денари, а беа склучени само 57 трансакции. Ретки беа продавачите, а уште поретки купувачите. Од тие 5 милиони денари, скоро 3 милиони беа во промет со државни обврзници. МБИ-10 и денеска 7-ми ден по ред паѓаше за -1,26% со вонредно мали количини на акции. Денеска само со компанијата Македонија од Гостивар беше направен промет поголем од 0,5 милиони денари. Беа истргувани 173 акции по 3.075 денари. Од “најликвидните акции” денеска најтргуван беше Алкалоид со 80 акции во промет за 339 илјади денари. Втор беше Македонски телеком со 300 илјади денари и 850 истргувани акции. Кај Комерцијална банка во текот на денот се собраа неколку купувачи на цена од 2.300 денари , но немаше кој да им продаде. Третото место по промет му припадна на Гранит со 238 илјади денари и 435 акции истргувани по просечна цена од 547 денари. Една извонредно ретка трансакција се случи денеска. Беа истргувани 15 акции на Тутунскиот комбинат од Куманово по 1.600 денари секоја. Со ова цената забележа пораст од 841% , а со тоа и пазарната капитализација на компанијата дојде до фантастични 900 милиони денари.

Се на се уште еден летен неактивен трговски ден на македонската берза – дежа ву што би рекле.