Дневен брокерски извештај - 09 јули 2009

Седумдневната надолна серија на македонската берза денеска беше прекината со раст на МБИ-10. Овој раст најверојатно се должи на позитивните движења и на најголемиот дел на светски берзи, бидејќи кај нас не се случи ништо значајно со што истиот би се оправдал. Тргувањето започна воздржано, со индиции за продолжување на падот, но во текот на денот купувачите се охрабрија и со многу мали количини индексот порасна за 1,46%. Вкупниот промет беше многу мал и изнесуваше само 5,5 милиони денари. Денеска продавачите не брзаа многу и најверојатно ќе почекаат некои повисоки цени.

Денеска Алкалоид беше компанијата која имаше најголем промет. Со 2,15 милиони денари таа оствари 40% од вкупниот промет на берзата. Беа истргувани 502 акции по просечна цена од 4.290 денари, односно со раст од 1,22% во однос на вчерашната просечна. Втора најтргувана беше Топлификација со промет од 533 илјади денари и 147 истргувани акции. Нејзината цена порасна 0,74%. Третото место со 360 илјади денари и припадна на Комерцијална банка. Таа порасна импресивни 4,30% со 150 истргувани акции по единствена цена од 2.400 денари. И Гранит растеше 2,26% со 371 истргувана акција по 560 денари. Дека не е се толку зелено се виде по падот од скоро -20% на РЖ Интертраншпед, и по падовите од околу -9% на Кјуби и на Хотели Метропол, но мораме да напоменеме дека кај сите беа истргувани многу мали количини на акции.