Пред стартот на целосната забрана за пушење

Угостителите од државата бараат средби со надлежните кои го донесоа новиот Закон за заштита од пушењето, со кој од Нова година на полноќ, се забранува пушење во сите угостителски објекти, летни бавчи и тераси. Тие инсистираат на извесни промени во Законот.
„Ќе бидеме принудени да отпуштаме вработени, а 17 илјади луѓе живеат од угостителството“, рече Љутви Гили, претставник на угостителите од Гостивар. Угостителите се сериозно загрижени за состојбата која би ги зафатила по евентуалната примена на, според нив, неевропскиот Закон за заштита од пушење.

„Во најголем дел од европските земји, забраната воопшто не се однесува на терасите и на отворените простории на угостителските објекти. Многу развиени земји нашле модел како да го заштитат туристичко-угостителскиот сектор, каде во затворениот дел од објектите имаат простор за пушачи“, вели Марија Николовска, претставник на угостителите од Скопје.

Затоа, тие апелираат за разговор со надлежните, заедно со нив да донесат некое решение, кое на европски начин ќе го реши проблемот, а на угостителите да им се овозможи да не се доведат во состојба да ги затворат објектите.

„Во Охрид како туристички центар, владее голема паника, по најавата дека Законот ќе важи за сите угостителски објекти и тоа токму по полноќ на Нова година“, рече Драган Битрача, угостител од Охрид. Тој нагласи дека во Законот е направен превид со тоа што на хотелите им е дозволено да имаат 30 отсто од собите резервирани за пушачи, а на терасите не смеат да пушат, ниту во летните бавчи.

Угостителите нагласија дека примената на овој Закон ќе им нанесе штета, но тоа ќе го почувствува и државата. Тие претпоставуваат дека со забраната за пушење ќе се троши помалку и алкохол, па ќе се намали и приходот на државата од акцизата.

„Од една страна имаме добри субвенции за тутунарите во државата, а од друга ги ограничуваме пушачите“, рече Светислав Стојановски од Куманово. Според угостителите, повикот за разговор со надлежните не е задоцнет. Доколку се има слух, нешто може да и да се смени.